كصبة شكر

حلاتك ليش هيجي امطشره اعله الثوب
ملهوفه الجفوف اتريد تختصرك




جمالك بين اديه يصير داخل قوس
لتخلي الجفوف المالحه اتبصرك



مملكتك شمع وآنه اعتنيتك خيط
شح بيه الضوه والنور يم قصرك




مريت اعله بابك شفت لمه اورود
اثاريهه الورود اتوسلت عطرك

فك دكمه بقميصك وحده موش اهواي
خل تاخذ بياض الدنيه من صدرك

واكعد عالسطح ليليه لو لحظات
مسكين الكمر ملهوف ينتظرك

ياكاغد ورق وبريسم اعله الطول
خاف اشبك عليك ويحترك خصرك



نهر حسنك عذب واوصافي كطرة ماي
طبعا من اوصف اغرك بنهرك

ياكصبة شكر بشفافك الحلوات
وريكي كلاص حنظل ينتظر شكرك




ماشايف جمر من السوالف ذاب
اذن مرني اعله طولك وانفخ بجمرك

اشتهيتك من كبل نار وثلج واعصار
لان كل الفصول انجمعت بسرك

من كد ماترف والمستحه اتحليك
اخافن من اكرب ريحتي اتسكرك



مر ايدك علي رجعني عشر اسنين
اريد ولام اصيرن وارهم لعمرك